Gestagangurinn í júní byrjaður :)

• Veðrið kl. 12
• Veðurspá

Reykjavík

A412°C

Velja staði

Akureyri
Egilsst.		S4	11°C
London		N3	24°C
K.höfn		NA3	24°C
New York		V2	28°C

Veður á mbl.is | Færð

Þar sem ég er hooked á veðurspánni ákvað ég að sýna muninn á stöðunni í dag á Íslandi og hér :)

Dagurinn í dag var með heitasta móti.  Við fórum út í garð í 4ra ára afmæli hjá Jóa í hádeginu og enduðu allir í skugganum þar sem það var orðið svo ólíft í hitanum.  

Ströndin hefur verið mjög vinsæl hjá okkur á frídögum.

Annars er gestagangurinn byrjaður á fullu.  Ingibjörg og Hlín komu í 2 nætur í vikunni og gistu 2 nætur.  Fannst samt eins og þær hefðu ekkert komið.  Þær vöknuðu drifu sig út og komu svo rétt yfir blánóttina.  Nú bíð ég bara eftir að fara út á völl og sækja Svanhildi og Herdísi sem ætla að vera í 3 nætur.  KK er akkúrat að fara til Íslands á morgun þannig að Lilja ætlar að passa annað kv. þannig við getur nú aðeins kíkt út.  Sem betur fer mega Atli og Marinó akkúrat mæta á morgun og hinn í frístundarheimilið og á leikskólann.  Vonandi fer þetta verkfall að verða búið. Það liggur við að það þurfi að setja Atla aftur í aðlögun.

Við skelltum okkur fjölskyldan í gær á kaffihús og fórum svo í risa hjólreiðatúr um Köben, þ.e. hjóluðum á Österbro og skoðuðum okkur um þar.  Alltaf verið að spá og spekúlera í mögulegum staðsetningum ef maður skyldi nú fjárfesta hér á landi.

Við despó píurnar hér í nimbusnum ætlum að skella okkur á Sex and the city myndina og fá okkur einn cocktail fyrir, það er nú samt hægar en gert að fá miða á myndina þannig við tökum hana kannski bara á DVD í staðinn...

Over and out

Lagersala lagersala lagersala

2 til 6-døgnsudsigt

Enn einu sinni að svekkja ykkur,  en það er bara búið að vera geðveikt veður hérna.

Ma og pa komu í heimsókn á afmælinu hjá Atlaling.  Gosi hafði komið helgina áður, s.s á meðan ég var á Íslandi.  Haldið þið ekki að hann hafi smitað alla hérna í nimbusnum af ælupest ojojoj.  Það lögðust allir hver af fætur öðrum og þar á meðal mamma og pabbi líka.  Ekki það skemmtilegasta, Gosi á von á hatursbréfi hérna frá íbúunum í Nimbusnum.

  Við héldum upp á afmælið hjá Atla hérna út í garði, það var aðeins fámennara heldur en hefur áður verið en það var góðmennt.  Smá tilbreyting að vera ekki sveitt fram á nótt að baka hahahha.

Andrea og ég skelltum okkur á lagersölu hjá Marlene Birger og gerðum góð kaup.  Daginn eftir fórum við svo í góða bæjarferð án þess að stíga inn á Strik og fundum út að það væri lagersala í WoodWood daginn eftir.  OMG við hjónin gengum út með ruslapoka :)  sem betur fer vorum við á stóra hjólinu. Við erum að tala um að flíkur sem kostuðu áður tugi þúsunda hafi verið á 100-300DKK.  Okkur fannst það ekki leiðinlegt!  Eftir lagersöluna skelltum við okkur í bakarí og garð og nutum góða veðursins.  Dagurinn endaði svo á stepudjammi á Jolene.

Við fjölskyldan skelltum okkur svo á ströndina í dag.  Frúin var að reyna að ná bóndafarinu fallega sem hún var búin að ná sér í í sólinni.

Næst á dagskrá hjá okkur er að taka á móti Ingibjörgu, Hlín og Davíð í þessari viku.  Hlökkum mikið til að hitta þau.

Þangað til næst

Sólbrennd og sátt

Bara svona til að svekkja ykkur langaði mig að setja inn veðurspánna fyrir næstu daga hérna í Köben :)  Maður er s.s vel rauður eftir daginn því maður heldur alltaf að þetta sé síðasti sólardagur sumarsins.  

Helgin var alveg frábær.  Þórhildur, Magnús og börn komu í mat á föstudaginn, vel blaut eftir rigninguna í Tívolí.  Á laugardaginn átti KK afmæli og bauð hann Ævari og Guggu í mat.  Á sunnudeginum fórum við svo í brunch til Andreu og Óla.  Sökum veðurs fórum við ekki inn fyrr en 8 um kvöldið.  

Við gerðum okkur ferð í Bilka vikunni áður og fjárfestum í grilli, eins og allt annað þá var 8 daga afhendingafrestur.  Á föstudeginum ætluðum við nú heldur betur að sækja grillið og orðin mjög spennt að fara að grilla (þó svo það megi ekki á svölunum).  Við hrökkluðumst í burtu því það var eins og það væri vikulokun í búðum því það var svo mikið af fólki.  KK ákvað að fara kl.8 morguninn eftir að sækja herlegheitin, þegar röðin var loksins kominn að honum eftir 40 mín bið þá var honum tilkynnt að grillið væri staðsett of hátt uppi og að hann gæti komið daginn eftir að sækja það.  Auðvitað dreif KK sig strax daginn eftir og fékk loksins grillið eftir mikla bið.  Þegar kassinn var opnaður kom í ljós að grillið var í frumeindum KK til mikillar gleði :)  Það tók tímana tvenna að setja fíneríið saman og ég er eiginlega fegin að hafa ekki verið heima á þeim tímapunkti.

Það er saumó hjá mér kvöld.  Ætli ég noti ekki daginn í að baka þar sem maður er svolítið rauður heheheh

Þar til næst

Sól sól skín á mig...

Það iðar allt af lífi í Kóngsins Köbenhavn, veðrið er búið að vera vægast sagt frábært fyrir utan einn rigningardag í gær.

Atli er búinn að vera alla vikuna í fríi á leikskólanum þannig að við erum bara búin að vera 2 að dúlla okkur í rólegheitum á meðan Marinó er í skólanum og KK að mála :)

Ég skellti mér í stelpu/húsmæðraorlof til Oslóar um síðustu helgi.  Helgin var frábær!  Við vorum heima hjá Sigrúnu allan tímann, fyrir utan þegar íslandshúsmæðurnar skelltu ser í mallið til að versla "smá".  Reyndar fórum við inn til Osló á laugardeginum og Christina kom með til að skoða Operuhúsið.  Ég var voða glöð með að fá að skoða eitthvað aðeins af menningunni í Osló.  Takk Sigrún fyrir frábæra helgi, þetta verður sko pottþétt endurtekið.  Manni finnst alveg ótrúlegt að koma óþreyttur heim hahahaha.

Það eykst gestagangurinn og nú er júní orðinn fullur :)  Herdís og Svanhildur ætla að skella sér til okkar í nokkra daga og verður mjög gaman að hitta þær.  Hildur og Felipe eru að hugsa um að koma líka eina helgi.  Davíð mætir í mat til okkar og svo auðvitað Magnea og Frosti.  Það verður voða gaman að fá alla.  Við hittum örugglega fólk oftar eftir að við fluttum út :)

Þórhildur og Magnús ætla að koma í dag mat til okkar og svo á KK afmæli á morgun og þá mæta hingað Ævar og Gugga.  Herra forvitinn uppgvötaði hvað ég hafði hugsað mér að gefa honum og bannaði mér það, s.s hjólabretti.  Kannski viturlegt þar sem aldurinn er farinn að segja til sín hehehe.  Þannig ég og Atli skelltum okkur í bæinn og keyptum gjöf.  Þegar við komum heim földum við hana vel og vandlega. Haldiði ekki að hann hafi farið af stað, ég er viss um að hann hafi verið að leita af henni, og fann hann gjöfina.  Ég er búin að vera brjáluð út af þessu og langar helst að skila þessu :)  

Á miðvikudaginn síðasta hittust svo desperate housewifes hérna í nimbusnum.  Við vorum 9 talsins og var svaka stuð hjá okkur.  Vonandi verður þetta að svona reglulegum hitting.

Jæja er farin út í góða veðrið, þar til næst... 

Sumar sumar

Það er orðið annsi langt síðan síðast :)  

Páskarnir komnir og farnir, mamma og pabbi komu og voru hjá okkur í 5 daga.  Alveg frábært að fá þau og styttist bara í næstu heimsókn þeirra í maí vei vei.

Gunnar, Rakel og Ísar komu og gistu hjá okkur eina nótt.  Við fórum með þeim í brunch á Laundromat, keyrðum eftir Strandvejen og kíktum í kaffi í Dragör.  Eigum vonandi eftir að sjá þau fljótlega aftur.

Hinrik frændi millilenti hér og kíkti í kaffi og smörrebrauð.  

Við fórum til Nakskov á fimleikamót.

Marinó fór í fyrsta bekkjarafmælið.

Hittum Aðalheiði og Gumma í brunch.

Fyrir utan allt þetta hefur verið nóg að gera í að halda tuskunni á lofti og moppunni á gólfinu.  Annars hefur hugur okkar verið á Íslandi hjá pabba KK þar sem hann veiktist alvarlega og er hefur legið á sjúkrahúsi síðastliðnar 2 vikur.  En sem betur fer fór allt á betri veginn. 

Við höfum tekið því rólega í aðlögunarferlinu en nú eru flestir að fá nóg af þessu atvinnuleysi og peningaeyðslu.  KK fékk sér tímabundna vinnu sem málari.  Hann er mættur kl.7 og búinn kl.15 og er hann held ég mjög öflugur í því starfi, allavega segir hann það hahaha.

Síðustu dagar hafa verið frábærir veðurfarslega séð, sól og sumarylur.  Á föstudaginn, þ.e. store bededag hittust nokkrir íslendingar og grilluðu saman í tilefni dagsins.  Við skelltum okkur svo á Bakken í gær með Sigga Frigg.  Áttum frábæran dag og var móðirin æstust í tækin og dró börnin með sér til afsökunnar.  Enda mátti það sjá á fötum hennar í lok dagsins þar sem þau voru gegnum blaut eftir mikið vatnsstríð á bátum.  Tók þessu mjög alvarlega ;)

Það styttist óðum í stelpuferðina til Osló.  Fer á föstudaginn til Sigrúnar í stelpuferð og er svaka spennt.  Það verður æðislegt að hitta stelpurnar og njóta helgarinnar með þeim.

Verður vonandi styttra á milli frétta næst.  Þangað til þá túrílítú.

Snjókorn falla ....

Einhver sagði mér að í mars kæmi vor hér í Danmörkunni!  Ég get nú ekki alveg sagt það, það snjóaði s.s síðastliðnu 2 dag og er spáð áframhaldandi snjókomu.  Ég fór út í gærkvöldi með myndavélina aðeins að prófa mig áfram.  Maður verður nú að láta reyna á það sem ég lærði á námskeiðinu hjá honum Pálmari.  Þær eru aðeins yfirlýstar en þetta kemur allt með æfingunni :)

Annars höfum við haft það fínt hérna í Goldenberg.  Engilbjört kom og var í þrjár nætur hjá okkur í síðustu viku.  Við tókum hverja búðina á fætur annarri og skönnuðum vel og auðvitað var gengið út með poka úr sumum.  Inga Lóa millilenti svo hérna á fimmtudeginum og kom og hitti okkur niðri á Striki auðvitað.  Hún tók líka ágætis session í búðunum á mjög skömmum tíma.  Við sátum auðvitað þess á milli á kaffihúsum og spjölluðum um heima og geima.

Á laugardeginum skelltum við okkur fjölskyldan til Malmö.  Tókum rölt í bænum og kíktum á kaffihús.  Ég leit á manneskjuna fyrir framan mig og þar stóð Eva með kærastanum Einari og voru þau að njóta dagsins í Malmö líka.  Ótrúlega skemmtileg tilviljun :)  Við brunuðum svo til Þórhildar og Magnúsar í mat.  Mjög gaman að koma til þeirra í fallega húsið þeirra í "sveitinni".  Við eigum pottþétt eftir að fara oft í heimsókn til Svíþjóðar :)  

Nú eru allir komnir í páskafrí og bíðum við spennt eftir páskaungunum með eggin hehehe. Mamma og pabbi eru  að koma í kvöld og ætla að vera hjá okkur fram yfir helgi.  Auðvitað er vel skipulögð helgi framundan.

Við erum auðvitað í kasti yfir genginu og vonum bara að swap markaðurinn snúi sér sem fyrst til baka.

Fyrir þá forvitnu þá eru samningaviðræður á lokastigi og vonandi skýrist allt í næstu viku.  Kannski líka tími til kominn, því það er alveg komið gott af hangsi og væri gott að fara fá tekjur inn á heimilið.

Jæja best að fara að þrífa áður en gamla settið mætir á svæðið og tekur allt út múhahahhaa

Ég óska öllum gleðilegra páska.

Vikan

Héðan úr baunalandi er allt það besta að frétta.  Þessi vika er sveitavika í leikskólanum hjá Atla sem þýðir að 1 sinni í mánuði fer deildin hans 4 daga í röð upp í sveit á bóndabæ þar sem krakkarnir fá að leika sér út í náttúrunni.  Kristján fór með honum á mánudaginn svo hefur hann farið einn hina dagana.  Þeim finnst þetta frábært og er Atli mjög sáttur við þetta allt saman. 

Marinó er mjög sáttur í skólanum og fer svo í frístundarheimilið eftir skóla.  Á mánudaginn fer hann svo með Lindu, sú sem tekur hann í dönskukennslu í skólanum, ásamt fleiri útlendingum í sveitarferð.  Mikil spenna fyrir það.

Fimleikarnir eru frábærir hérna og er Marinó þvílíkt spenntur að fara á æfingar.  Ég sit í rúma 2 tíma á meðan og fylgist með og spjalla við foreldrana.  Það er mjög gaman að sjá framfarirnar.  Í gær voru þeir að æfa heljarstökk og framflikk.  Ég lifi mig ótrúlega inn í þetta, kannski einum of :) Það er fínt að fara og hitta foreldrana, allri mjög almennilegir og ég tel að maður komist fljótar inn í samfélagið þegar börnin eru farin að stunda einhverjar tómstundir.  Nú þarf ég bara að fara að koma Atla af stað líka.

Kristján er farinn að æfa á fullu.  Annað hvort er hann úti að hlaupa eða í ræktinni.  Svo er hann líka frekar harður í mataræðinu fyrir utan negrakossana sem hann dettur stundum í muhahahaha.  

Á þriðjudaginn fann ég fyrir smá eirðarleysi þannig ég dró KK með mér í hjólatúr og hjóluðum við niður á Istegade og kíktum í búðir og skelltum okkur á kaffihús.  Það var mjög nice.  Það er um að gera að nýta tímann þar til hann byrjar að vinna.

Við keyptum okkur sjónvarp á miðvikudaginn í síðustu viku og áttum að sækja það á föstudeginum.   Ég hringdi voða spennt í búðina til að tékka hvort tækið væri komið en eins og KK var búinn að segja þá var svarið miðvikudagur í næstu viku.  Á miðvikudaginn hringdi ég aftur og þá var svarið í síðasta lagi á föstudag.  Ég óþolinmóða manneskjan skildi eftir 2 skilaboð til að búðin myndi hringja í mig (hringdi í þjónustuverið) en enginn hringdi til baka.  Í gær hringdi ég aftur og þá var það ekki heldur komið og ég lýsti yfir þvílíkri óánægju minni með þetta (var orðin svo spennt að fá tækið).  Það var svo seinnipartinn í gær sem hringt var og tækið var komið jibbíí.  KK sótti tækið og ég náttúrlega vildi fá það strax upp, þannig gærkvöldið fór í að horfa á fína sjónvarpið þó það væri ekkert skemmtilegt í boði.  

Fyrsti gesturinn er búinn að boða komu sína í næstu viku, gaman gaman.  Engilbjört vinkona ætlar að koma á þriðjudaginn og vera fram á föstudag.  Þannig næsta vika verður í búðum og á kaffihúsum.  Ekki leiðinlegt það og hlakka ég mikið til að fá hana.

Jæja þá er kaffibollinn búinn og ég ætla að fara að taka úr þvottavélinni :)

Bið að heilsa í bili

Uppþvottavélastríðið mikla

Jæja ég held ég hafi loksins sigrað uppþvottavélina mína, þ.e.a.s kalkið í vatninu.  Maður heldur alltaf að allt virki eins og heima á Íslandi, en nei svo er ekki :)  Við gerðum okkur enga grein fyrir því að það þyrfti að setja salt fyrir uppþvottavélar í vélina þannig loksins þegar vélin komst í gang og við voða glöð og settum allt á fullt þá kom allt hvítt út.  Ég er að segja ykkur að ég hélt að það væri allt ónýtt.  Ég eyddi miklum tíma í að vaska allt upp og ekki er enn allt orðið eins og það var.  En allavega eftir að við vorum búin að setja ég veit ekki hvað marga poka af salti, kaupa hin og þessi efni til að fá gljáa og hreinsa uppþvottavélina og ekkert gekk.  Það var ekki fyrr en eftir örugglega 20 tilraunir í þvottum að vélin virkaði.  Ég verð samt að  viðurkenna að ég hlakka ekkert sérstaklega til að fá rafmagns og hitareikninginn hehehehe.   Sem betur fer fórum við í heimsókn til Vilborgar og Óskars um síðustu helgi þar sem hún fræddi mig um ýmsa hluti eins og að það þarf að setja  minus kalktöflur í þvottavélina í hvert skipti sem maður þvær þvottinn og svo er ediksýra sem er látin renna í gegnum kaffivélar og önnur eldhústæki, allt þetta til þess að að þessi tæki hafi sem lengstan líftíma.  Annars væri maður örugglega í því að skipta út nýjum tækjum.

Annars gengur allt fínt.  Marinó er búinn að fara 2 daga í skólann og líst vel á.  Hann lenti í mjög góðum bekk og eru krakkarnir mjög hjálpsamir og reyna að gera allt til að auðvelda honum fyrir.

Atli er búinn að standa sig eins og hetja og er búinn að vera 3 daga í þessari viku aleinn á leikskólanum.  Hann er mest með einum strák á sinni deild og skipar honum í bak og fyrir á íslensku og hinn skilur ekki neitt.  Það er frekar fyndið að fylgjast með þessu.

Á föstudaginn fengu Gummi og Ása gáminn sinn og KK fór og hjálpaði þeim að bera inn dótið.  Þau eru s.s flutt í næstu blokk og er mikill spenningur að fá leikfélaga á mínu heimili.

Í dag laugardag vaknaði fjölskyldan fyrir kl. 6 til að keyra til Árhúsa þar sem Marinó var að keppa í árlegri liðakeppni hér í Danmörku á milli allra liða.  Atli nennti ekki að eyða tíma sínum í íþróttarhúsinu heldur kaus hann frekar að vera dekstraður af frændum sínum (kannski frekar stjórna þeim).  Það var frábært að sjá framförina hjá Marinó, þeir þurfa þó að bæta sig aðeins því þeir lentu í 4. sæti af 5.  Hann var í skýjunum eftir daginn og mátti hann það líka alveg.

Á morgun ætlum við skötuhjúin svo að skella okkur 2 í bæinn og rápa um og skoða á meðan Lilja ætlar að hafa ofan af fyrir strákunum.

Bið að heilsa í bili

Mvh. Begga

Helgin

Á föstudaginn fór ég með Atla á leikskólann og gekk ágætlega.  Það kom smá erfitt moment.  Það er haldin samverustund hjá krökkunum þar sem þau setjast öll í hring og eru lesin upp, svo er einn valinn til að telja krakkana og farið í einhverja leiki.  Atli mús varð svolítið lítill í sér og brotnaði aðeins niður og þá fékk mamman tár í augun líka.  Það hlýtur að vera erfitt að skilja ekki neitt og geta ekki tjáð sig.  Vonandi kemur þetta fljótlega.  Hann gleymdi sér svo alveg í leik og spjallaði bara á íslensku við krakkana.  Það eru 2 önnur íslensk börn á leikskólanum en á öðrum deildum.

Skólastjórinn í skólanum hringdi loksins í mig á föstudaginn og við vorum boðuð á fund á morgun þannig ég vona að Marinó geti byrjað í skólanum á þriðjudag.  Við bíðum spennt eftir því að fá að vita hvort það verði meiri bið á þessu.

Á föstudagskvöldinu fór ég svo í saumó hjá Andreu þar sem 10 íslenskar voru samankomnar að ræða málin.  Það var mjög fínt, líka gaman að komast aðeins út :)

Á laugardaginn fórum við svo með lestinni upp til Aarhus í heimsókn til Óskar og Vilborgar.  Þar var þvílíkt vel tekið á móti okkur.  Axel og Ómar voru búnir að þrífa bílinn okkar hátt og lágt og áttu ekki til orð yfir skítnum hmmm.  KK taldi líka að hann hefði aldrei þrifið hann svona vel.  Nú er bara að viðhalda þrifunum.  Atli og Marinó voru klesstir við frændur sína allan tíma og voru dekstraðir út í hið óendanlega.  Í dag keyrðum við svo heim á kagganum sem var aðeins hnjaskaður eftir flutningana en við vonum bara að tryggingarnar coveri það.  

 Í síðustu viku fengum við uppsagnarbréf á leigunni!  Málið er að sú sem sá um allt fyrir okkur  lét okkur hafa reikning til að leggja inn á hjá leigufélaginu og við greiddum trygginguna og leiguna fyrir febrúar inn á þann reikning frá Íslandi.  Þegar KK ætlaði svo að fara að leigja stæði í bílakjallaranum fékk hann það ekki þar sem við skulduðum félaginu.  Við fórum að kanna málið og hafði þá frúin látið okkur fá reikning hjá öðru leigufélagi.  S.s tæp millj. lá inni hjá röngum aðila.  Hún ætlaði í ganga í málið strax.  Við leigðum stæðið og héldum að allt væri klappað og klárt.  11 feb fengum við svo bréf um að febrúar væri ekki greiddur og KK hringdi strax í frúnna og sendum við henni kvittunina.  Í vikunni var svo dinglað og var það pósturinn með ábyrgðarbréf sem var s.s. uppsögn á leigusamningnum, við áttum að vera flutt út innan 8 daga takk fyrir.   Ég hringdi strax og ræddi við frúnna og ætlaði hún að láta mig hringja en þar sem mér fannst þetta hennar feill lét ég hana standa í þessu.  Við vonum bara að það mæti ekki hérna flutningamenn í næstu viku og beri okkur út á götu.  Við fengum á föstudaginn gíróinn fyrir mars þannig ég ætla bara að borga hann og vona að allt verði í lagi, annars flyt ég inn á frúnna með allt mitt hafurtask hahahaha ef hún bara vissi.

Jæja ég færir fleiri fréttir af okkur hér í baunalandi seinna.  Bið ykkur vel að lifa þangað til.

Kv. Beggs

Byrjunin

Jæja við erum s.s flutt til Köben.  Ég verð eiginlega að vera hreinskilin með hvað mér finnst kerfið hérna vægast sagt svolítið spes.  Við s.s byrjuðum á því að fara og skrá okkur inn í landið en þá lá kerfið niðri þannig við þurftum að koma aftur, ekkert mál með það.  Þegar við komum aftur gekk þetta allt eins og í sögu og erum við öll komin með okkar dönsku kennitölur.

Til að fá bankareikning getur maður ekki gengið inn í næsta banka eins og á Íslandi og opnað sinn bankareikning, neiiii það þarf að panta fund í bankanum og tók það viku að fá þann fund.  Við röltum yfir í bankann á mánudaginn í góðri trú um að allt myndi ganga vel en viti menn kerfið lá niðri þannig að fundurinn fór fyrir bí og við fórum aftur heim og biðum eftir símtali sem kom 2 dögum seinna.  Nú bíðum við bara eftir okkar kortum þannig við getum byrjað að spandera :)

Þegar við fengum íbúðina afhenta þá átti maður að koma og fara yfir hvað væru margir slökkvarar, klósett, hurðar o.þ.h. í íbúðinni.  Hann s.s meldaði sig 1.feb kl.10.  Kristján var vaknaður fyrir allar aldir en svo leið og beið og ekki mætti maðurinn.  Viku seinna kom afsökunnarbréf og ný tímasetning.  Við drifum okkur í að koma sem flestu fyrir þannig að íbúðin liti þokkalega út.  Daginn sem maðurinn átti að koma biðum við og biðum en nei ekki mætti hann.  Það var ekki fyrr en mín sendi vel orðað mail á leigufélagið sem að hann loksins mætti til að taka allt út.  Ef ég ætti að bera saman saudana og dana þá held ég að saudarnir hafi jafnvel verið áreiðanlegri, ótrúlegt en satt.  Annars er íbúðin mjög fín og alveg frábærlega staðsett.  Búum í litlu íslendingasamfélagi hérna, held að það séu 4 ísl. fjölskyldur í okkar blokk.

Atli komst strax inn á leikskóla og byrjaði í vikunni í aðlögun, svolítð sjokk bjóst ekki við að þetta gerðist svona fljótt.  Það er aftur á móti annað mál með skólann hans Marinós.  Við fórum strax á fund hjá skólaskrifstofunni sem gaf okkur upp síma og uppl. um skólann sem hann byrjar á að fara í og átti ég að hringja í byrjun þessarar viku í skólastjórann.  Það var ekki fyrr en 4 dögum seinna, 8 símtölum og búin að skilja eftir nokkur skilaboð með númerinu mínu að haft var samband til baka.  Við fengum s.s fund næsta mánudag í skólanum og vonandi fær hann að byrja strax daginn eftir.  Ég hélt ég myndi snappa á einhverjum röngum aðila í þessu ferli.  Maður lærir kannski að verða þolinmóðari hérna :)

Annars er búið að vera mjög rólegt hjá okkur.  Kristján hefur verið á fundum og við erum búin að taka því rólega og átta okkur á hvernig landið liggur.  Marinó byrjaði í fimleikum í vikunni og er s.s farinn að æfa 3x í viku 2 tíma í senn.  Hann ætlar að keppa 1.mars í Árhúsum þannig þá fer hele familien að styðja við bakið á honum og kíkjum svo í kaffi til Óskars og Vilborgar á eftir.  

Ég held ég láti þetta nægja í bili.

Mvh. Begga bauni